യുഎഇയിൽ ജോലി തേടി എത്തുന്നവരുടെ എണ്ണത്തിൽ ഇപ്പോഴും യാതൊരു കുറവുമില്ല. അതേസമയം പണ്ടത്തെ പോലെ അല്ല, ജോലി തേടി പോകുന്നവർക്കെല്ലാം പെട്ടെന്ന് ജോലി ലഭിക്കുന്ന സാഹചര്യം രാജ്യത്ത് ഇല്ല. വിവിധ തൊഴിൽ മേഖലയിൽ മത്സരം കൂടിയത് തന്നെയാണ് തിരിച്ചടിയായത്. അതേസമയം ചില മേഖലകളിൽ ഇപ്പോഴും വേണ്ടത്ര വൈദഗ്ധ്യം ഉള്ളവരുടെ ക്ഷാമം നേരിടുന്നുണ്ടെന്നാണ് റിപ്പോർട്ട്. അതിലൊന്ന് പൈലറ്റുമാരാണ്. 3000ത്തോളം പേരുടെ കുറവാണ് ഈ മേഖലയിൽ ഉള്ളത്. മിഡിൽ ഈസ്റ്റിൽ വരും നാളുകളിൽ പൈലറ്റുമാർക്ക് കടുത്ത ക്ഷാമമായിരിക്കും നേരിടുകയെന്നാണ് റിപ്പോർട്ട്. ഈ സാഹചര്യത്തിൽ ലക്ഷങ്ങൾ ശമ്പളം കൊടുത്ത് പൈലറ്റിനെ നിയമിക്കുകയാണ് കമ്പനികൾ.
2032 ൽ ആഗോള തലത്തിൽ 80,000 പൈലറ്റുമാരുടെ കുറവ് ഉണ്ടാകാനാണ് സാധ്യത. നോർത്ത് അമേരിക്ക കഴിഞ്ഞാൽ ഏറ്റവും കുറവ് മിഡിൽ ഈസ്റ്റിൽ ആയിരിക്കും. 2023 ൽ 3,000ത്തോളം ആളുകളുടെ കുറവാണ് ഉണ്ടായിരുന്നത്. 2032 ൽ 18,000ത്തോളം പേരുടെ കുറവാകും. വരും വർഷങ്ങളിൽ വിമാനയാത്രാ ആവശ്യങ്ങൾ കുത്തനെ ഉയരുന്നത് സ്ഥിതി കൂടുതൽ രൂക്ഷമാക്കുമെന്നും വിദഗ്ധർ ചൂണ്ടിക്കാട്ടുന്നു.
ടൂറിസം മേഖലയിലെ വികസനമാണ് പൈലറ്റുമാരുടെ ഡിമാന്റ് വർധിപ്പിച്ചതെന്നാണ് വിദഗ്ധർ അഭിപ്രായപ്പെടുന്നത്. യുഎഇയിൽ ഏവിയേഷൻ, ടൂറിസം മേഖലയിൽ വൻ കുതിപ്പാണ് രേഖപ്പെടുത്തുന്നത്. ഇതാണ് ലക്ഷങ്ങൾ നൽകി പൈലറ്റുമാരെ നിയമിക്കാൻ കമ്പനികളെ പ്രേരിപ്പിക്കുന്നതെന്ന് വിദഗ്ധർ പറയുന്നു. വ്യോമയാന കമ്പനിയായ എമിറേറ്റ്സ് 34,000 ദിർഹം വരെ (7 ലക്ഷത്തിലധികം രൂപ) പൈലറ്റുമാർക്ക് ശമ്പളമായി ഓഫർ ചെയ്തതെന്നും റിപ്പോർട്ടിൽ വ്യക്തമാക്കുന്നു. ശമ്പളം മാത്രമല്ല, താമസം, വാർഷിക അവധി, വിദ്യാഭ്യാസ അലവൻസ് തുടങ്ങി മറ്റ് ആനുകൂല്യങ്ങളുൾപ്പെടെ തൊഴിലാളികളെ നിലനിർത്താൻ ആവശ്യമായതെല്ലാം കമ്പനികൾ നൽകി വരുന്നുണ്ട്.
യുഎഇയിൽ മാത്രമല്ല ആഗോള തലത്തിൽ തന്നെ പൈലറ്റുമാരുടെ ഡിമാന്റ് ഉയർന്നിട്ടുണ്ടെന്ന് എമിറേറ്റ്സ് ഫ്ലൈറ്റ് ട്രെയിനിങ് അക്കാഡമി വൈസ് പ്രസിഡന്റ് കാപ്റ്റൻ അബ്ദുള്ള അൽ ഹമ്മദി പറഞ്ഞു. വളരെ എക്സൈറ്റിങ്ങായൊരു മേഖലയാണിതെന്നും, ഇനിയും കൂടുതൽ പേരെ മേഖലയിൽ ആവശ്യമായി വരുമെന്നും അദ്ദേഹം പറഞ്ഞു. ബിരുദധാരികൾക്ക് തൊഴിലവസരങ്ങൾ ഉറപ്പാക്കുന്നതിനായി ജിസിസി ഉൾപ്പെടെ നിരവധി രാജ്യങ്ങളിലെ വ്യവസായ പങ്കാളികളുമായും എയർലൈനുകളുമായും തങ്ങൾ ചർച്ച നടത്തുന്നുണ്ടെന്നും അദ്ദേഹം പറഞ്ഞു.
