പ്രവാസികൾക്ക് ജോലി നൽകുന്ന സ്‌ഥാപനങ്ങൾക്ക് അവർക്ക് നൽകുന്ന ശമ്പളത്തിൻ്റെ ഒരു വിഹിതം സർക്കാർ വഹിക്കുന്ന പദ്ധതി നിലവിൽ വന്നു. സംസ്‌ഥാന സർക്കാർ സ്‌ഥാപനമായ നോർക്ക റൂട്ട്സ് വഴിയാണ് പദ്ധതി നടപ്പിലാക്കുന്നത്. നോർക്ക അസിസ്റ്റഡ് ആൻഡ് മൊബിലൈസ്‌ഡ് എംപ്ലോയ്മെൻ്റ് അഥവാ നെയിം (NAME) എന്നാണ് ഈ പുതിയ പദ്ധതിയുടെ പേര്.
സംസ്‌ഥാന സർക്കാർ നോർക്ക റൂട്ട്സ് വഴി തിരിച്ചെത്തിയ പ്രവാസി കേരളീയർക്ക് നാട്ടിലെ സംരംഭങ്ങളിൽ തൊഴിൽ ലഭ്യമാക്കുന്നതിന് ലക്ഷ്യമിട്ട് നടപ്പാക്കുന്ന പദ്ധതിയാണ് നെയിം. നോർക്ക റൂട്ട്സ് ലിസ്‌റ്റ് ചെയ്യുന്ന ഉദ്യോഗാർഥികളിൽ ഉൾപ്പെടുന്ന പ്രവാസി കേരളീയരെ നിയമിക്കുന്ന തൊഴിലുടമയ്ക്ക് പ്രതിവർഷം പരമാവധി 100 തൊഴിൽദിനങ്ങളിലെ ശമ്പളവിഹിതം (വേജ് കോംപൻസേഷൻ) സർക്കാർ നൽകും. പ്രതിദിനം പരമാവധി 400 രൂപ എന്ന നിരക്കിൽ, ഒരു സ്‌ഥാപനത്തിൽ പരമാവധി 50 തൊഴിലാളികൾക്കാണ് വേജ് കോംപൻസേഷൻ ലഭിക്കുക.
സഹകരണ സ്ഥാപനങ്ങൾ, എംപ്ലോയീസ് സ്‌റ്റേറ്റ് ഇൻഷുറൻസ് (ഇഎസ്ഐ), എംപ്ലോയീസ് പ്രൊവിഡന്റ് ഫണ്ട് (ഇപിഎഫ്), ഉദ്യം, റജിസ്ട്രേഷനുള്ള സ്വകാര്യ/പബ്ലിക് ലിമിറ്റഡ്/ എൽഎൽപി കമ്പനികൾ, അംഗീകൃത സ്‌റ്റാർട്ടപ്പുകൾ തുടങ്ങിയവക്ക് അർഹതയുണ്ട്. പദ്ധതിയുടെ തുടക്കത്തിൽ ഓട്ടോമൊബൈൽ, കൺസ്ട്രക്‌ഷൻ, ഹോസ്‌പിറ്റാലിറ്റി മേഖലകളിലെ സംരംഭങ്ങൾക്കാണ് ആനുകൂല്യം ലഭിക്കുക.
ആനുകൂല്യങ്ങൾ ലഭിക്കണമെങ്കിൽ തൊഴിൽ ദാതാവ് ആദ്യം നോർക്ക റൂട്ട്സിൻ്റെ വെബ്സൈറ്റ് വഴി രജിസ്റ്റർ ചെയ്യണം. തുടർന്ന് മേൽപറഞ്ഞ നിബന്ധനകൾ പൂർത്തിയാക്കി ത്രൈമാസമായി ക്ലെയിം സമർപ്പിക്കാവുന്നതാണ്. ഓരോ മൂന്നുമാസത്തിലും 25 ദിവസം എന്ന രീതിയിലായിരിക്കും വേജ് കോംപൻസേഷൻ വിതരണം ചെയ്യുക. അപേക്ഷാഫോമിനും വിശദവിവരങ്ങൾക്കുമായി www.norkaroots.org. സന്ദർശിക്കുക. മറ്റ് വിവരങ്ങൾക്ക് ബന്ധപ്പെടുക 0471-2770523.
പ്രവാസികളുടെ തൊഴിൽ നൈപുണ്യവും അനുഭവപരിചയവും സംരംഭങ്ങൾക്ക് പ്രയോജനകരമാകുന്നതിനൊപ്പം തിരികെയെത്തിയ പ്രവാസികൾക്ക് കൂടുതൽ തൊഴിലവസരങ്ങൾ ലഭ്യമാക്കുന്നതിന് തൊഴിൽ ദാതാക്കൾക്ക് പ്രോത്സാഹനം നൽകുന്നതിനും പദ്ധതി ലക്ഷ്യമിടുന്നു. പ്രവാസി പുനരധിവാസത്തിനായുള്ള നോർക്ക റൂട്ട്സിന്റെ എൻഡിപിആർഇഎം, പ്രവാസി ഭദ്രത എന്നീ സംരംഭകത്വ വികസന പദ്ധതികൾ കൂടാതെയാണ് നെയിം പദ്ധതി.
യോഗ്യതകൾ
1) കുടുംബ വാർഷിക വരുമാനം 3 ലക്ഷം രൂപയിൽ കവിയരുത്.
2) നോർക്ക റൂട്ട്സിൻ്റെ അംഗീകാരം ലഭിക്കുന്ന സ്‌ഥാപനങ്ങൾക്കും തൊഴിലാളികൾക്കുമാണ് പദ്ധതിയുടെ ആനുകൂല്യം ലഭിക്കുക.
3) ആനുകൂല്യം, ജീവനക്കാരുടെ വ്യക്തിഗത ബാങ്ക് അക്കൗണ്ടുകളിലേക്ക് വേതനം കൈമാറുന്ന തൊഴിൽ ഉടമകൾക്കാണ് ലഭിക്കുക.
4) രണ്ടു വർഷത്തെ പ്രവാസ ജീവനം ഉണ്ടായിരിക്കുകയും, തൊഴിൽ വീസയില്ലാത്ത അല്ലെങ്കിൽ തിരികെ എത്തിയിട്ട് ആറുമാസം കഴിഞ്ഞവരെയാണ് തിരികെ വരുന്ന പ്രവാസികളായി കണക്കാക്കുന്നത്
5) പ്രായം 25നും 70നും മധ്യേ ആയിരിക്കണം
6) വിദ്യാഭ്യാസ യോഗ്യത മാനദണ്ഡങ്ങൾ ബാധകമല്ല എങ്കിലും തൊഴിലിന്റെ സ്വഭാവം അനുസരിച്ചുള്ള യോഗ്യതകൾ ഉണ്ടായിരിക്കണം.
7) പ്രവാസികളുടെ സഹകരണ സംഘങ്ങൾ നടത്തുന്ന സ്‌ഥാപനങ്ങളാണെങ്കിൽ അത്തരം സ്‌ഥാപനങ്ങളിൽ 90ശതമാനവും അംഗങ്ങൾ പ്രവാസി മലയാളികൾ ആയിരിക്കണം.
